June 2012|جون 2012
 

نیہہ دو


 

ازۍ کس شمارس منز شامل نگارشاتن متعلق۔


غلام نبی خیال سنز یہ کامیاب نظم یۅس تہنزِ "الہام" شعرہ سۅمبرنہِ منز شامل چھیہ، چھیہ تہنزن بہترین نظمن منز شمار۔ امہ نظمہ ہند علامتی استعاراتی اظہار ، ژھۅچر، تہ فکری عنصر چھہ سیٹھامتاثر کن۔ اتھ منز چھہ انسانی وجود کہ تمہ روحانی تکلیفک احساس یمیک وجہ یتھ دنیاہس منز انسان سنز پیوندکاری چھیہ۔


شفیع شوق سند یہ غزل چھہ ژکہ فیس بک مشاعرہ خاطرہ وننہ آمت۔ شوق سند غزل چھہ بالکل جداگانہ، اکھ الگ تہ نٔو وتھ کڈنچ کوشش۔ اتھ غزلس منز چھیہ غنایت بالکل مفقود تہ تمہ بدلہ چھہ تفکرک غلبہ نظرِ گژھان ۔ شوق تہ ناجی منور سند کاشرِ ادبہ کہ تواریخک تازہ ایڈیشن گوٚو علی محمد بک سیلر سندِ طرفہ حال حالے شایع۔


قیصر احمد ملک چھہ کشمیر یونیورسٹی منز ریسرچ سکالر۔ یمن میج حال حالے ڈاکٹر محفوظہ جان سنزِ نگرانی منز "نادم نہِ اسلوبک ساختیاتی مطالعہ" مقالس پیٹھ پی ایچ ڈی ڈگری۔یتھ مضمونس منز چھ یمو نادم سنزن کینژن نظمن ہند جایزہ پیش کورمت۔


شکیل الرحمن چھہ نٔوس کاشرس افسانس منز اکھ اضافہ۔ یہ چھہ افسانن منز لۅکٹۍ لۅکٹۍ واقعہ گاشراوان تہ تمن منز سیاسی، سماجی حالاتن ہندۍ اشارہ تہ تحریک پیدہ کران۔ واقعاتی تہ زمانی طور چھہ امۍ سندٮن افسانن منز سٮٹھا اختصار ، کنہ ساتہ حدہ کھۅتہ زیادہ اختصار۔


حیات عامر حسینی چھہ زیادہ تر نظمہ لیکھان تہ تمن چھیہ زیچھرس سیتۍ سیٹھا رغبت۔ امۍ سنزہ نظمہ چھیہ فلسفہ، تہ زمان ومکانکۍ تصوراتن منز تسنزِ دلچسپی ہنزہ عکاس۔ یہ غزل چھہ امہ کہ دوٚگن قافیہ کنۍ توجہس لایق۔