June 2012| جون 2012
 


 

 

بنی آدم


غلام نبی خیال

 


زندگانی ناد لویم تہ بہ سپدس موجود
اچھ زہ مژریم تہ ژۅاپارۍ وچھم گاش پھۅلان
دور تاں سمہِ بٹھہِ روٚس نیول سمندر ڈیوٹھم
آفتابچ گۅدنچ زژ پییہ یامت آبس
نارہ لہرو اجدرہ سندۍ پٲٹھۍ پھُکر ہیتۍ تراونۍ
رنگ برنگی جانوراہ غیبہ پیٹھن آو وپھان
تونتہِ منز گاسہ تلاہ پیوس ےہ گوٚو توتہِ وڈان
گاسہ تل واوہ دکو سیتۍ وسان گوٚو بۅن بۅن
نارہ لہرو بییہ ہیوٚت نار چھکن رقص کرُن
بوٚڈ سمندر چھہ تلان شور نظر چھس ہیوٚر کن
وشفہ کنۍ ما سا خداین تہِ یہ آدم یوٚت اوٚن
جانور بولنہِ لوٚگ بوٚڈ چھہ خدا بوٚڈ چھہ خدا
یورہ گژھنچ سۅ پتم وِز ییلہ واتیم ٲخر
گردِ سیتۍ آسہِ یہ دامن ژھیوٚنمت ہایہ گوٚمت
اتھ اگر دژم یہ دنن نال خبر اوٚر روزیا
پلون ونکہِ پیٹھے پیوندہ ہیرہ بۅن چھہِ کھسان
کیا چھنا جان بہ لوٚژراوہ برونہے بور پنن
ننگہ موٚت ہیو کڈہ ییتہ یم ژلونۍ کژتاں دۅہ
واے یم پیوندہ نحقے چھہِ پھیکٮن گۅبراواں
تونتہِ منز جانورس گاسہ تلاہ پیوٚو سہ تہ پیوٚو
جانور از تہِ چھہ پرواز کران فضہس منز


یتھ تحریرس متعلق کیا چھیہ تہنز راے؟ پننۍ تاثرات کٔرو ای میل۔