نيب / آنلاين نيب

 

کٲشرِ زبٲنۍ ہندۍمہجوٗر،آزاد تہ عٲرف ہوۍ شٲعر ٲسۍ گۅڈہ گۅڈہ مارکسی فلسفس لٲرۍ تہ مارکسی نظریس سیتی پھیٖرۍ یِم ترقی پسندی کُن ژورمہِ دہلہِ پٮٹھہ یٔژ پٲٹھۍ حٲوی رودۍ۔ترقی پسند دورک ساروے کھۅتہ اہم تہ نمایاں شٲعر چھہ دیناناتھ نٲدم۔أسۍہیکو یہ ؤنِتھ زِ کٲشرِ شٲعری منز ترقی پسند رجحان برونہہ پکناونس منز تہِ چھہ نٲدم صٲبُن رول ساروے کھۅتہ اہم۔نٲدم صٲبنہِ شٲعری ہندِ بدولتہ چھِہ ترقی پسندی کُن نور محمد روشن،امین کٲمل تہ رٲہی ہوۍ شٲعر مٲیل گژھان۔نٲدم صٲبن چھہ پننہِ شٲعری منز عصری ضرورتک پریتھ کانہہ موضوع ورتومت۔نٲدم صٲبنہِ شٲعری منز چھِہ اسہِ انقلٲنی نظمہ تہ عالمی برٲدری ہندۍ نغمہ تہ، تمۍ لیکھۍ نعت،لیٖلایہ،مرثیہ تہ پریتھ کُنہِ قسمکۍ بٲتھ تہِ۔تمۍ سنزِ شٲعری منز چھہِ کینہہ اہم سیٲسی واقعہ مثلاً ستتٲجہہ،تُرونزاہ،دہٲٹھ،پانژ ہٲٹھ تہ اکستتھ۔امۍ سنزشٲعری منز چھِہ اسہِ گاندھی جی،اندرا،شاستری،بخشی تہ شیخ محمد عبداللہ ہِوٮن سیٲسی لیٖڈرن نذرانہ تہ مارکسی،لینن ،مدر ٹریٖسا،ہوچی من عالمی رہنماہن تہِ نذرانہ۔کٲمل صٲبنہِ ماجہِ ہندس مرنس پٮٹھ تہِ لیچھن اکھ مرثی، تہ پریتھ موضوعس بخُش نٲدم صٲبن پنن پنن اسلوب۔پروفیسر شوق چھہ نٲدمس متعلق لٮکھان

"نٲدم صٲبن ییلہِ کٲشرس منزلٮکھن ہیوٚت تمِس برونٹھ کنہِ آسہ زبان ورتاونچہِ مختلف رٮواتہ موجود۔امس برونہہ کنہِ اوس خاص کر 'مہجورُن گل تہ بلبل' تشبہی اظہار،آزادنۍ انقلٲبی بلاغت صمد میر یا احد زرگرُن رٮوٲیتی اشارتی انداز یا کٲشرٮن لولہ شٲعرن ہنز باوتھ۔مگرنٲدم صٲبن کٔر اکھ نٔو وتھ اختیار تمۍ ہٲونہ مجوزہ شعرہ لفظن منز کانہہ دلچسپی بلکہ شٲعری نٮبر مروجہ بول بوش چہِ زبٲنۍ ہنزِ زندگیہِ منز۔امچہِ نامیٲتی حرکٔژ منز،امہِ کِس بے پھرُک آرتس منز، امہِ چہ یٲگی موسیٖقہِ منز تہ امہِ کِس غیر اسلوبی اسلوبس تہ کۅمجارس منز۔یوٚہے انتخاب اوس نٲدمنہِ شٲعری ہُند نوٮر تہ منفرد رنگ یُس زبردس مقبول سپد۔یہ تجرُبہ اوس نہ برونٹھے قٲیم۔شٲعرانہ زبٲنۍ ہنزِ کُنہِ مستند ترتیٖبس منز تبدیٖلی اننچ کوشِش بلکہ صریحاًاکھ نٔو ترتیٖب پٲد کرنچ عمل یتھ شٲعرن پننہِ تخلیٖقی کُن کمالہ سیتۍ اعتبار بخُش"

نٲدم صٲبس برونہہ چھیہ سانٮو شٲعرو رٮوٲیتی وژن،واکھ،غزل،تہ نظمچ پابند فارم پانہ نٲوِتھ پننٮن جذباتن زٮو دژمژ۔مگر ییمہِ وز‏ِِِِ نٲدم صٲب کٲشرِ شٲعری کُن چھہ یوان امہِ وِزِ نہ ٲسۍرٮوٲیتی وژن،واکھ،غزل تہ نظمچ ضرورت بلکہ اوس پنن زمانہ پننۍ ہیت منگان۔یۅسہ امہِ دورچ حٮس آگہی وٮترٲوِتھ ہیکہِ ہے ۔ٹی ،اٮس،ایلیٹ چھہ ونان " زِ پریتھ دورس چھیہ اکھ شعری ہیت آسان۔یتھ امہِ دورک نمایند شٲعر بروے کار أنِتھ وجود بخشان چھہ" نٲدم صٲبن لیچھ پننۍ گۅڈنچ کٲشِر نظم "مٲج کٔشیٖر" بندے ماترم کِس شٲعر سندۍ پٲٹھۍ ژھوٚٹن "ماجہِ کٔشیٖرِ ہند زو زٮتہ ییمہِ آیہ

گت زننی بھوٲنی مٲج پننی ژیہ کمۍ ووٚننے ژہ چھکھ بے کس تہ بے بس
ژیہ کمۍ ووٚننے ژہ چھکھ أژھ یا تہ تنگ دس ؟
امہ پتہ کوٚر نٲدمس مرزا عٲرف صابن نشاط باغہ کِس بہاریہ مشٲعرس منز پنن کلام پرنک باند باند۔نٲدم صٲبن بوزنٲو سونتہ کہ آو آوچ اکھ نظم یۅسہ کٔشیٖرِ ہندٮن حالاتن ہنز زان کرناوان چھیہ ؂

مژراوی برتے دارِ ویٚسی سونتھ ہے سالہ آو
تمۍ آسہِ ژومژ لولہ ہتٮن کارِ پتٮن سیتۍ
یا آسہِ شوٚنگمت میانہِ دلہ کٮن نارہ تتٮن سیتۍ
نتہ کیا وۅشلیومت چھہ بانس ژھایہ صبحک واو
یتھہ کنۍ پھیور نٲدم صٲب کٲشرِ شٲعری کُن ۔مگر نٲدم صٲبنۍ گۅڈہ کالچ شٲعری ٲس نعر بٲزی تہ نۅم شعر تہِ چھِہ وقتی اضطرابس تہ چکہ چاوس زٮو دِتھ باند باند کران

ژ ہ نار چُھکھ الاو چُھکھ
ژہ یاونُک جلاو چُھکھ
اگر ژہ سونتہ واو چُھکھ
مہ روز اوٚبرہ تلۍ کٔھٹِتھ
نظم گراو تہِ چھیہ اتھۍ سیٲسی خیالس پانس منز لۅلہ کھوٚل کران ؂

یمن ژیہ مارنُک جنون
یمن نمن چھہ چون خون
نسا تمن چھیہ ماے چٲنۍ
یموٚو کٔشیٖر زٲج چٲنۍ
بیانیہ تہ صحافتی ٲسِتھ تہِ ہیکو نہ اتھ منٲسب آہنگس گسہ آمت یا ٹاسر ؤنِتھ۔اتھ تہِ چھہ پنن اکھ نوٮر تہ سٲدر وٲری۔امیک اندازہ ہیکہِ نظمن ہندٮو یموٚو ناوو تلہ تہِ واضح سپدِتھ مثلاً نعرہ شباب،گراو،کٔشیٖر ہنددعوی،ہرد،پژُھن چُھم،میہ چھم آش پگہچ،بہ گٮونہ از،میہ چھم کٲم باقی بیترِ بیترِ۔

نٲدم رودیمن سارنے نظمن منز تژھ زبان ورتاوان یۅسہ خطیبانہ لہجہ دار تہ نعرہ بٲزی باسان ٲس۔تکیازِ یمن نظمن منزچھیہ نٲدم صٲبن اکثرپٲٹھۍ تمن دۅہن ہندۍ کٔشیٖرِ ہندۍ سیٲسی حالاتن پٮٹھ زیادہ زور دیتمُت تہ امۍ سنز اکثر شٲعری ٲس نعر بٲزی ییمہ کِنۍ نٲدم نہِ اتھ گۅڈہ کالچہ شٲعری اکھ ولولہ انگیز آہنگ تہ اسلوب اوس۔امہِ شٲعری ہند اسلوب اوس اکہ جذبٲتۍ گریکہِ ہندنتیٖجہ باسان بلکہ اوس اکھ خطیٖبانہ لہجس منز لوکن تلقیٖن کران مثلاً نٲدم صٲب اوس یِتھۍ ہوۍ لفظ ورتاوان وۅتُھن چھم،ساز، جنگ، سامان،دٮوانہ،وطن،سڑک،قوم، طوفان،گگرایہ،محشر،وۅزلۍ،نعرہ،سماج،رسم،رٮواج،بنیُل،مفلس،آلم، پاسبان، غۅلٲمی، سامراج، گراو، چاک، غریٖب، جمہور، موزور،نغمہ، گٮوُن،کھہن،کھلن،قمیُر، کُکِل، لون ،نوٚن ونُن، دروت، رگ تہ پرون، پِشُل پِشُل، غلہ دار بیترِ بیترِ۔ یہ اوس نٲدمنہِ شٲعری ہند سہ اسلوب ییمہِ کِس پس منظرس مارکسی نظریہ تہ خاص کر ترقی پسندی ہند سونچ اوس۔

یتھ پٲٹھۍ ہیکو ؤنتھ زِ نٲدم صٲبنۍ گۅڈہ کالچ شٲعری ٲس اتھۍ سیٲسی تہ سمٲجی رنگس لٲر یتھ منز نٲدمنہِ شٲعری منز شٲعری کم تہ نعر بٲزی زیادہ ٲس۔مگر نٲدم صٲب اوس اکھ حٮسہ ہشار شٲعر تہ شعرُت وۅتلاونکۍ نوینہ طریقن ہند اوس سیٹھاہ جان پٲٹھۍ وٲقف کار۔نٲدم صٲب چھہ اتھ خیالس متعلق پانہ ونان "میہ ووت واریاہ کال لفظن تُلہ تراو کٔرِتھ نوۍ نوۍ نقش کران میہ چھہ باسان لفظ چھہ مورت تہ صدا تہِ تہ خیالن ہند سوٚن وۅگُن تہِ ۔۔۔۔امہِ علاو چھہ لفظ انسٲنی کلچرچ اژھیٚنۍ توٲریٖخ تہِ۔پننہِ کٲشرِ شٲعری ہند پتھ کال بدِ کٔڈتھ چھہ ننان زِ شعرچ عظمت چھہ تمیک رادہ ژھۅچر، زیوِِ پٮٹھ کھوٚتمت کتھ باتھِ ہند لہجہ، وۅکھنیہ ہند موٚدریار تہ ٹریجڈی ہند۔۔۔انسٲنی تجربک سنٮر تہِ۔یہ عظمت چھیہ از اوایل سانہِ شٲعری منز لل دٮد تہ نندریٚش نیو واکھو تہ شُرکٮو پٮٹھ صوفیانہ موسیٖقی تام احاطہ کٔرِتھ۔یی دٲیرتھ لیٖکھۍ میہ حٲرۍثاتھ تہ زتنہِ تہ پتہ توثُر تہ وۅنۍ جاپٲنۍ ہاٮکو طرزکۍ ژھۅٹہِ آیہِ واکھ۔"

نٲدم صٲبنہِ دوٚیمہ دورچ شٲعری چھیہ اکھ الگ وتھ تہ اکھ وکھرہ انداز ہٮتھ برونہہ کُن یِوان۔تکیازِ نٲدم صٲبن دیت کٲشرس منز جدید دورک گۅڈنیک آلو تمہِ ساتہ ییلہ سہ نظم "نابد ٹٮٹھ ون" لٮکھان چھہ۔امۍ سندس اثرس تل یتھ چھہِ کٲشرِ شٲعری ہندۍ کینہہ اہم شٲعر موضوع تہ ہیٚژ ہندۍ نوۍ نوۍ تجربہ کران مثلاً رحمان رٲہی سنز "دہہ ؤہرۍ" امین کٲملنۍ "یاربلُک سحر" غلام نبی فراق سنزنظم "محبوب سنزِ قبرِ پٮٹھ" تہ "بلبلس کُن" نظمو سیتۍ چھہ کٲشرِ ادبچہ نوِ شٲعری ہندآغاز گژھان۔اتھ رۅجحانس برونہہ پکناون والٮن منزچھہ ساروے کھۅتہ اہم شٲعر نٲدم۔تکیازِ نٲدم صٲبے اوس سہ شٲعر ییمِس یہ خیال ساروے برونہہ گوٚو زِ نظریٲتی شٲعری ہند تبلیغی اندازہ نِشہِ پزِ لوٚب ہیوٚن تہ اکھ نوٚو اسلوب اختیار کرنک ضرورت باسیوس کٲشرِ شٲعری منز۔امہِ تبدیٖلی سیتۍ سپدیہ زِ نٲدمن ترٲو ترقی پسندی ہنز نعر بٲزی تہ لوگُن زندگی ہندٮن عام معمولاتن سنُن۔نٲدم اوس حٮسہ ہشار شٲعر امۍ ژیون زِ کٲشِر شٲعری پزِ اسہِ عام دۅہ دٮنچہ زبٲنۍ نزدیٖک اننۍ۔

بہرحال نظم"نابد ٹٮٹھ ون" لیٚکھتے کوٚر نٲدمن نوِ شٲعری ہند دسلابہ۔نٲدم صٲبنہِ امہِ نظمہِ سیتۍ سپدکٲسرِ شٲعری منز اکھ نوٚو رنگ پیدہ تکیازِ امہِ برونہہ اوس نہ اسہِ نِش یُتھ ہیو شعری تجربہ نظرِ گژھان ۔یہ لیٚکھتھ کوٚر امۍ اکہِ نوِ اسلوبک دسلاب۔نظم "نابد ٹٮٹھ ون"چھیہ امہِ چالہِ گۅڈنِچ نظم۔اتھۍ نظمہِ منز چھہِ اسۍ گۅڈنچہ لٹہِ سلسلہ وار تہ ترتیٖب وار خیالو بدلہ گۅڈہ پٮٹھہ اندس تام اکھ سنہ وُن تہ سنٮر لبن وول توثُروچھان۔اتھ نظمہِ منز چھہ شٲعر اکِس واقعس عجیٖب،غیر معمولی تہ حیرت ناک طریقہ پیش کران۔امہِ نظمہِ ہنزپریتھ کانہہ تشبیہہ چھیہ پننہ جایہ مکمل مگر تہِ کٔرِتھ اکہِ وسیع ترشبیہک حصہ بنان۔شٲعر چھہ پننہ موضوعک طلسمات ژیٖنتھ دور دور اندیشن منز راوان۔پریتھ رنگہ چھہ اتھ منزنوٮر گژھان۔زنتہ نٲدم چھہ انقلٲبی موضوعن ژھٮن دِتھ نوٮن مسلن اٹھ دنہ باپتھ کمر گنڈان تہ نظمہِ منز چھہ لہجک نوٮر

بجلی بتہِ اندۍ اندۍ مہۍ جوراہ
ویٖگس پیٹھ مہرینۍ مہرازاہ
ہُتھ کلۍ شہلس تل ٹٮکہ بٹنۍ
وُنۍ درامژ ووٚبۍ چوکہ لوتھ (نابد ٹٮٹھ ون)
یہ اوس پزے کٲشرس منز اکھ نوٚو تہ منفرد اسلوب تہ اندازِ بیان۔

پروفیسر مرغوب بانہالۍ چھہ اتھ نظمہِ متعلق ونان "پریتھ کانہہ مصرعہ چھہ اکھ پیکر تہ پریتھ کانہہ پیکر چھہ پننہ جایہ بیٚیس پیکرس نِشہِ بیوٚن تہ بدون اکھ حقیٖقت"

نٲدم نہِ شٲعری منز چھہِ اسہِ وکھرہ وکھرہ ہیٚژ تہ موضوع نظرِ گژھان مثالے نظم "پاں ژادر" منز چھہ اسہِ اکھ نوٚو صوتی پیکر عطا سپدان تہ یم صوتی پیکر چھہِ تَسندِ‏ اظہارُک ژھرٮر پور کران۔اتھ نظمہِ منز یُس صوتی تکرار اسہِ برونہہ کُن چھہ یوان سہ ہیکہِ سُے ژیٖنتھ ییمۍ اہرہ بلُک آبہ شور پانہ بوزمت آسہِ تہ تمِچ شدت پانہ محسوس آسٮن کٔرمژ ؂

جَر جَر جررَر جررَر جررَر
جَر جَر جرار جرار جرار
شَر شَر شرار شرار شررَر
شَر شرَ شرار شرار شررَر
رَسہ رَسہ چُھ کران آر مژر
شَر شَر شرار شَر شرار شررَر (نظم پاں ژادر)
نٲدم چھہ کٲشریک سہ شٲعر ییمۍ سماجس پننہ شٲعری منز جاے دِژ یعنی پننہ سماجکۍ موضوع چھِن ورتٲوۍ متۍ چاہیے تم کونہ چھِہ سماجکۍ عام موضوع یا لۅکٹۍموضوع مگر نٲدمن چھہ یمن شعری موضوعن سۅ زبان دِژمژ ییمہِ ورٲے نہ یمن موضوعن کانہہ زبان شوبہے۔یم موضوع وچھتھ چھہ نہ اسہِ یہ وننس کانہہ ٹھوٚر بُتھہِ یِوان زِ سہ چھہ شعوری طور اندۍ پکھۍکٮن مسلن پننہ شٲعری منزجاے دوان مثلاً سماجی،سیٲسی تہ حقیقی زندگی ہندٮن رنگہ رنگہ پہلون پٮٹھ قلم تُلان۔امہِ قبیٖلچ اکھ شاندار نظم چھیہ "ڈل ہانزنہِ ہند گٮوُن" اتھ نظمہِ منزچھیہ ہانزنۍ ژاکہ وارِ منز بہتھ تازہ ڈل سبزی تہ ترکٲریہِ خریدارن کننُک نقشہ ییمہِ آیہ پیش کرنہ آمت

تازہ مُجہِ بدۍ چھِہ ہلہِ ژھایہ زوتن
ڈینبہ گۅگجا وۅزج بیٖب خوتن
زن سنگر مالہ نے لٔج پُھلے ہے
ہے وولے ہے وۅلے ہے وۅلے ہَے (ڈل ہٲنزنہِ ہند گٮوُن)
"کٲٹھۍ درواز پیٹھہ گرہ تام" نظم چھیہ نٲدم صٲبنۍ اکھ شاندار نمونہ تہ اکھ تھٮکُن لایق کارنامہ کٲشرِ شعری ادبہ خٲطر۔ اتھ نظمہِ منز چھہ شٲعر (theme) أتی ترٲوتھ موضوع زیر بحث رودمت یُس سہ ہیرِ پیٹھہ بۅن تام نظمہِ منز باوان چھہ۔نظمہِ منز چھہ جنسک طنز تہ مروجہ سماجس منز پھانپھلیامتہِ شعورک عکس برونہہ کُن یِوان ؂

توٚت کیاہ با چُھکھ
پونسس پی پنۍ
وُپھ دِتھ زن ژٔج
میہ تہِ گژھ پی پِنۍ
توٚت کیاہ با چُھکھ
تریشا چمہ ہا (کٲٹھۍ درواز پٮٹھ گر تام)
نظمہِ منز چھیہ رمزن تہ کناین کٲم ہٮنہ آمژمثلاً نظمہِ منز چھہ تژر ہاوان جنسکہِ جزبک زور،تژر تہ مژر یہ اوس نٲدمن اکھ نوِ چالہِ تجربہ کٲشرِ شٲعری منز۔تکیازِ یُتھ ہیو تجربہ اوس نہ وُنہِ کٲشرِ شٲعری منز نظرِ گژھان۔امہِ تجربہ سیتۍ کُھلیوو کٲشرِ شٲعری ہند دامان تہ اکھ نوٚو جہار بخُش نس۔امہِ نظمہِ ہنز بیاکھ خوبی چھیہ زِ یہ چھیہ ڈراما چالہِ تکیازِ اتھ منز چھیہ مکالمہ بٲزی تکیازِ شُر تہ موج چھیہ پانہ وٲنۍ مکالمہ بٲزی کران تہ نظم چھیہ کتھ باتھِہ ہندس صورتس منز اند واتان۔

نٲدم صٲبنۍ اکھ نظم چھیہ "مچھ" یہ چھیہ اکھ سٮٹھہے عامیانہ موضوع مگر اتھ عٲمیانہ موضوعس چھہ نٲدم پننہ شعر ی فنہ سیتۍ اکھ خوبصورت تخلیٖق بناوان۔یمیُک موضوع تہ فارم چھہِ وکھرہ۔ یہ چھیہ اکھ علامتی نظم تہ یہ چھیہ ازۍ چہ زندگی ہنز کۅکٲرۍ تصویر پیش کران۔اتھ نظمہِ منز چھہ شٲعرن اسلوب تہِ وکھرہ ورتومت مثلاً سڑک،ترکہ پُھٹ ہون،سکریٹ،دروازہ بیترِ چھیہ زندگی ہنزہ نوِ علامژ و رٔنگۍ شٲعرن ورتٲوۍ متۍ تہ زندگی ہنز اکھ تصویٖر چھیہ پیش سپزمژ۔بُتھۍ پشجہِ چھہ شٲعر خوش شکل زنانہِ سیتۍ مشابہت دِوان تہ یہے زنانہ چھیہ زندگی ہنزوٮوہار أنزراوان تہ انسان چھِہ مچھن ہندۍ پٲٹھۍ دفترن کُن دوان۔شٲعر چھہ اتھ نظمہِ عام فہم تہ زنتہ وتہِ پٮٹھ تُلۍ متۍ لفظ ورتاوان تہ زندگی ہنز اکھ المناک تصویٖر چھیہ أچھن برونہہ کُن یِوان یۅسہ موجود نظام کہِ ژھررُک باس دوان چھیہ

بُتھۍ پشجہِ چھیہ وٮوہار کران
اد صبحن گژھ۔۔۔أچھ پٮٹھ أچھ
امۍ ترکہ پُھٹۍ ہونۍ ٹوں ٹوں لوگُس
پیوس نیندرِ وۅتُھن (مچھ)
"گاسہ تُل" نظم چھیہ نٲدم صٲبنۍ اکھ لۅکٹۍ نظم۔اتھ نظمہِ منز چھہ شٲعر زندگی ہند صورت حال "گاسہ تُل" سندۍ ذریعہ پیش کران۔گاسہ تُل چھہ شٲعرن بحیثیت اکہ زندہ جاوید زندگی ہنز علامت بنیومت۔اکِس گاسہ تُلس زندگی سیتۍ مشابہت دِتھ چھہ شٲعر سند شٲعرانہ فن اسہِ برونہہ کُن یوان۔تکیازِ شٲعر چھہ تمہِ چیٖز سیتۍ اسہِ برونہہ کنہِ زندگی ہند خاکہ پیش کران ۔یُس چیٖز انسانس اندۍ پکھۍ چھہ تہ دۅہس ہتہِ لٹہِ اتھ سیتۍ مۅکھ مُدٲے گژھان۔یہے چھیہ شٲعر سنز شٲعری ہنز ساروے کھۅتہ بٔڑ ہنر مندی ۔اتھ منز چھہ شٲعر عام تہ دۅہ دشکۍ لفظ ورتٲوِتھ اکھ نوٚو اسلوب پیدہ کران تہ عام فہم زبٲنۍ منز چھہ گاسہ تُلۍ سند حال باوان۔ نظمہِ منز چھہ نہ شٲعر وزنس پابند مگر شٲعرن چھہ نظمہِ منز تمہِ آیہ شعری اسلوب ورتومت زِ نظمہِ منز چھہ آہنگ تہ موسیٖقی برقرار روزان

یتھ گاسہ تُلس گٔیہِ میٲنۍ ونن
سریٚہہ اوس تیلہِ اوس پوٚٹ پِشُل
واوس تہِ نمن تہ تاوس تہِ نمن
وندہ رٲژن منز از رووُس سریٚہہ (گاسہ تُل)
نظم "سونتھ تہ ہرد" اتھ منز چھہ شٲعر سرمایہ دٲری تہ سودا بٲزی ہند حال باوان اکِس عام فہم تہ سادہ لفظن منز۔نظمہِ ہندس گۅڈنکِس شعرس منز چھیہ اکہ خوبصورت تشبیٖہہ کٲری سیتۍ سجٲوِتھ تہ لطیٖف وتش دِوان

گاہ لوٚگ گٹہِ سیتۍ متۍ کرنے
شبنم لوٚگ باغس پھوٚتۍ برنے
میہ چھہ باسان شاید اوٚبرس تل وُزملہ لٔج مس مُژراونے
کوہہ پیٹھۍ پاں ژادر ہکچہِ کٔرِتھ
رۅنہِ دامانس چھۅنہِ مۅختہ جٔرتھ (سونتھ تہ مرد)
شعرس منز وُزملہ ہند مس مُژراوُن تہ پاں ژادرِ ہِنزہکچہِ کرنہِ۔شیٚبیٖہہ چھیہ حُسنچ ژٮنہ ون دوان تہ سانٮن رٮوٲیتن دٔرراوان۔یژھہ مثالہ چھیہ اسہِ نٲدم صٲبنہِ شٲعری منز جایہ جایہ نظر گژھان۔

نٲدمن کٔرۍ پننہ شٲعری منز رنگ بررنگ موضوعن ہندۍ تجربہ تم رودۍ واریاہس حدس تام کامیاب باقین شٲعرن نٮسبت۔نٲدمن کرِ کینہہ لۅکچہِ نظمہ نوِ طرز پیش مثالے نظم "ٹاواہ ٹاواہ"، "سہ تہِ اوس دوہا" تہ "زندہ باد‘" ہشہِ نظمہ بیترِ چھیہ موضوع کہ ورتاوہ رنگۍ نوۍ تہ کامیاب تجربہ یمن منز نہ چھہِ (Mannerism) نہ سیٲسی نعر ہ بٲزی تہ نہ خطابانہ لہجہ۔یمن نظمن منز چھہ شٲعر فنکارانہ آیہ پننۍ تجربہ ،مشٲہدہ باوان تہ گہے وۅمیذن تہ آشن ہند ماتم پیش کران۔تہ گہے ینہ وٲلس وقتس تہِ اندیشہ بٔرژو نظرو وچھان۔نٲدمس چھہ قدرن ہندراون تیوٚل تہِ ہنگامہ خیز زندگی چَھس وبوٚدُرتُلان۔

نٲدم صٲب چھہ پنن وندہ باونہ خٲطرہ لفظن ہندس علامتی طاقتس تہِ کٲم ہٮوان۔یہ کٲم چھہ شٲعر شعوری طور انجام دِوان۔ امہِ مۅکھہ چھہ شٲعر علامتی لفظ ژھانڈھنس تہ لفظہ گرتِس گۅڈہ انوٲرۍ دِوان۔سہ چھہ مذہب، ادب، معشیت، توٲریٖخ تہ اوسطورہ نِش ا میک استفادہ کران تہ پننس شعری اسلوبس اکھ مٲرۍ مندیُت عطاکران۔یمن شعبن سیتۍ وابستہ لفظ چھہِ نٲدمنہِ شٲعری منز جایہ جایہ نظرِ گژھان چاہیے نظم ٲسۍتن یا آزاد نظم، حٲرۍثاتھ ٲسۍ تن یا سانٮٹ ٲسۍتن مثالے انگورۍ،آسمان،ابلوُن،اوٚدُر،بنگہ ٹیوٚٹھ،ببہ ٹینڈۍ،بُرزہ بال،مۅنہِ پٔھلۍ،مُٹھۍہلم،کانل،کلپترا،غلطن،کنہ دور،کھروٚب،سِوۍ،جولۍ،ٹکہ واوج،تاپہ ٹینکۍ،شُکنتلا،مالیُن،ژھی ژھی،لوتھ بیترِ بیترِ لفظ چھِہ نٲدمن کلامس منز جایہ جایہ نظرِ گژھان۔

بہرحال نٲدمنہِ شٲعری ہند مۅخصر جٲیزہ ہیتھ چھہ نہ یہِ وننس منز اسہِ کانہہ تہِ ٹھوٚر بُتھہِ یوان زِ نٲدم اوس کٲشرس لفظہ انبارس پیٹھ پورِ پوردسترس تھاوان ۔نٲدمس ٲسۍ نہ لفظ ژھانڈنۍ پٮوان۔ بلکہ ٲسۍ تٔمِس لفظ برونہہ کنہِ استادہ گژھان۔امۍ ورتٲوۍ نہ پننہ شٲعری منز نوۍ لفظ بلکہ کرِنۍ پرٲنۍ فرسودہ گمتۍ لفظ نیہ آیہ پیش زنتہ ٲسۍ یم لفظ نٲدمنہِ شٲعری خٲطرے پیدہ گمتۍ ۔یہے اوس نٲدمنہِ شعری اسلوبک بنیٲدی جوہر۔
یتھ تحریرس متعلق کیا چھیہ تہنز راے؟ پننۍ تاثرات کٔرو ای میل۔