Kashmiri Novel | کاشر ناول
 

 

کاشرۍ ناول ہیکوکھ اسۍ اونگجہ ٹینڈٮن پیٹھ گنزرتھ۔ ناول نہ آسنک اکھ وجہ چھہ کاشرچ خاندگی نہ آسنۍ۔ ناخاندگی ہند بوٚڈ وجہ چھہ کاشرۍ سنز پننہ زبانۍ منز کام چلاو کتھ باتھہِ علاوہ عدم دلچسپی۔ غزل یا نظم ہیکہ اکھ شاعر بییس شاعر سندِ خاطرہ لیکھتھ، مگر ناول چھہ وسیع ریڈرشپ منگان۔تہ اتھۍ سیتۍ سیتۍ لیکھن والۍ سنز ریتہ وادن بلکہ ؤری وادن ہنز محنت۔

ابتدایی ناول آیہ تتھ وقتس منز لیکھنہ ییلہ ترقی پسندی ہندِ بہانہ واریاہ پرۍ متۍ لیکھمتۍ لوکھ کاشرس ادبس کن آیہ تہ اکھ خالی میدان برونہہ کنہ وچھتھ نظر انداز کرنہ آمتۍ امکانات بدِ کڈنہِ لگۍ۔ اتی آیہ دود تہ دگ (اختر محی الدین)، گٹہِ منز گاش (امین کامل)، اسۍ تہِ چھہِ انسان (علی محمد لون) ہوۍ ناول برونہہ کن۔ امہ پتہ کٔر خاص کر غلام نبی گوہرن کینہہ ناول لیکھتھ لوکن ہند توجہ اتھ صنفس کن پھرنچ کوشش۔

کینژن ناولن ہندۍ اقتباس چھہِ پیش۔ گٹہ منز گاش ییہ وارہ وارہ مکمل طور پیش کرنہ۔