January 2012| جنوری 2012
 

 

پرنٹ ایڈیشن نیب شمارہ 26


نیہہ دو

نوِ ؤریہ ۲۱۰۲ پیٹھہ ییہ ’’نیب‘‘ رسالہ بییہ پرانۍ پاٹھۍ دۅیہ دۅیہ ریتۍ شایع کرنہ ۔البتہ ییہ رسالک حجم کم کرنہ مگر تہِ کٔرتھ تہِ روزِ کم از کم ۰۴ صفحن ہند۔ کینہہ دوست ٲسۍ رسالہ وژھہِ وژھہِ شایع کرنچ یہ خواہش ہٮتھے ظاہر کران۔ تہندس حکمس چھٮہ تعمیل۔

رسالس چھٮہ دۅن چیزن ہنز ضرورت آسان۔ اکھ پونسہ ٹ63نکۍ تہ بیاکھ مواد۔ یم زہ چیز آسن تہ پرن والٮن ہنز چھٮہ نہ کمی۔ مٮہ چھٮہ خوشی زِ یم دۅشوے ضرورژ پورہ کرنہ خاطرہ چھہِ میانۍ کینہہ یار دوست پیش پیش۔ تمن ہند بے حد شکریہ۔ امہِ علاوہ چھہ پریسک مالک مصطفے صاب تہِ اسہِ پٮٹھ مہربان۔ تسند تہِ چھہ شکریہ لازم۔

یمہِ رسالک ساروے کھۅتہ اہم حصہ چھہ ژوٚک موٚدر ۔ یہ حصہ چھہ لیکھن تہ پرن والٮن درمیان اکھ ڈایلاگ قایم کران تہ تہِ کرنہ فن پارن ہند تہ رسالک معیار ہرراونس منز تہِ مدد کران۔ وۅمید چھٮہ اتھ منز نِن یار دوست زیادہ زیادہ دلچسپی۔ واریاہو وجوہاتو کنۍ چھہِ اسۍ پننٮن فن پارن پٮٹھ یا اکھ اکۍ سندٮن فن پارن پٮٹھ کتھ کرنس یا تہ مندچھان نتہ گوٚش دوان۔ اتھ رٔوِیس منز چھٮہ تبدیلی ہنز ضرورت۔ حالت چھٮہ یہ زِ اسۍ چھہِ سوال پرژھنس کھوژان تہ سوالن شک چہ نظرِ وچھان۔جواب دنس تہِ یا تہ کھوژان نتہ کننہ ڈول دوان ۔ اگر کٲنسہِ ہندیو داہو شعرو منزہ اکھ شعر تہِ پسند آو یا نظمہِ ہند کانہہ حصہ پسند آو، تمیک اقرار کرُن چھہ ضروری۔کانہہ افسانہ یا تنقیدی مضمون یا یمن متعلق کانہہ کتھ پسند آے،تمیک اظہار کرن چھہ ضروری۔ سانٮن بزرگ ادیبن ہنز چھٮہ اتہِ نس زیادہ ضرورت تکیازِ تہندۍ تجربہ چھہِ سانہِ خاطرہ مۅللۍ۔

رسالکۍ تعریف یا رسالہ کس مدیر سندۍ تعریف چھہِ نہ ضروری۔

ہم عصر ادیبن درمیان چھٮہ ادبی چپقلش ہمیشہ روزمژ تہ یہ چھٮہ نہ کانہہ تعجبچ کتھ۔ مگر امہِ وجہ کنۍ اکھ اکۍ سندۍ بہترین فن پارہ نظرانداز کرنۍ چھہ نہ کانہہ نیک عمل۔ اسۍ چھہِ پننٮن ہم عصرن (خاص کر نوٮن ادیبن) ہنز لیاقت برونہہ کنہِ ٲستھ تہِ نظر انداز کران۔ اسۍ چھہِ یژھنے مصلحژن تحت بزرگ ادیبن ہندٮن کارنامن تہِ گوٚش دوان۔ یہ رٔویہ تہِ چھہ تبدیلی منگان۔

کانسہِ تہِ ادیب سندٮن فن پارن بلکہ تسندس فنی وجودس چھہِ تسندۍ پیش رو معنی بخشان، لہذا چھہِ پننٮن پیش رون ہنز عظمت تسلیم کٔرۍ تھے اسۍ پننہِ ادبی جوازچ گنجایش پیدہ کران۔یتھے پاٹھۍ چھہ پرٮتھ ادیب سند مستقبل تہ بقا نوٮن نوٮن ادیبن ہنزِ نمو داری ستۍ وابستہ۔ اگر نہ اسۍ ینہ والٮن ادیبن ہنزلیاقت تسلیم کرو،سون مستقبل چھہ گال کھاتس گژھنک خطرہ۔

ژوٚک موٚدر چھہ رسالس منز چھپن والٮن تخلیقاتن علاوہ کاشرِ زبانۍ تہ ادبہ کٮن مسلن پٮٹھ مباحثہ شروع کرنہ خاطرہ اکھ اہم فورم۔ چھپنکۍ تہ چھپاونکۍ زیادہ موقع تہ ذرایع نہ آسنہ کنۍ تہ کم فرصتی کنۍ چھہِ اکثر سانۍ چھکرتھ خیال ضایع سپدان۔ ژوٚک موٚدر چھہ یمن رژھراونہ تہ یمن پٮٹھ گفتگو کرنہ خاطرہ آیتن۔یوٚدوے جایہ ہنز کانہہ بندش چھٮہ نہ، تاہم پزِ اسہِ پننۍ کتھ ارتکازہ سان موثر طریقہ پیش کرنہ کس فنس کٲم ہینۍ۔

نیب چھہ اکھ خالص ادبی رسالہ۔ سیاست تہ عقیدت گژھہِ مباحثن منزتژے ہن پھِرنہ ینۍ یوتاہ اکھ ادبی رسالہ ژٲلتھ ہیکہِ۔

نیب رسالہ چھہ کشیرِ اندر سرینگر تہ باقی قصبن منز کتاب فروشن نش دستیاب۔ فی الحال چھہ نہ کشیرِ منز سالانہ زر رٹنک کانہہ انتظام۔ البتہ ییہِ کشیرِ نٮبر سالانہ زرس پٮٹھ رسالہ واتناونہ۔

۔۔ منیب الرحمن


_______________________

مشمولات: تلاش (افسانہ) ۔۔۔ امین کامل، زیں زیں زکھ (افسانہ/نظم) ۔۔۔ مظفر عازم، غزلہ/نظمہ۔۔۔رشید نازکی، ہمعصر افسانہ: موضوعی تہ ہیتی تجربہ۔۔۔شفیع شوق، نظمہ۔۔۔منیب الرحمن، غزلہ۔۔۔محمد رمضان، کنہ منہ توووو (افسانہ)۔۔۔فیاض دلبر، پتھ کیا ادہ؟ (افسانہ)۔۔۔فیاض دلبر، غزلہ۔۔۔شہناز رشید، غزلہ۔۔۔حیات عامر حسینی، غزلہ۔۔۔شفق سوپوری، غزلہ۔۔۔رخسانہ جبین، غزلہ ۔۔۔غلام حسن انظر، وزن تگہِ بوزکن (تبصرہ)۔۔۔شاد رمضان، لکہ ہند مال پننس کھاتس (تبصرہ) ۔۔۔منیب الرحمن