January 2012| جنوری 2012
 

خواب گاہ پٔرین ہند


ڈاکٹر شفق سوپوری، سرینگر

 

عجیٖب جانورن پر مژرۍ پشس پیٹھ یِتھ

نظر تجم تہ وچھم شہرہ چہ قلایہ اندر

چلان اوس خرید و فروخت سڑکن پیٹھ

گہان لعل و جواہر وَتن تہ کوچن منز

تہ کینہہ قزاق کھٔٹتھ شراکہ آستیٖنن منز

اکھ اکھ غزال زِ بالا بلند، کو تہ قبا

اشارہ، غمزہ، ادا، دلبری نگارن ہنز

بدن سراے تہ زیتونہ تیلہ ژانگۍ دزان

الاوہ، خیمہ تہ وحشی رقص تہ بیووٚن بیووٚن انگ

شبس سرایہ اندر اوس دورِ جام عجب

جبیٖنِ بزمِ طرب محورِ مہ و کوکب

طیس پیٹھ اوس سہ بازارِ دِرہم و دینار

تہ شہسوار زرہ زیبِ تن، نقاب بتھِس

سِپر تہ گۅرزہ اتھن منز ۂلِس گٔنڈِتھ شمشیر

اشارہ سیتۍ میہ ہووُن تہ دور بستی نِش

اکس وجارہ مکانس اندر أژِتھ ووٚننم

ژہ کھول دٔرچہ تہ وُچھ خواب گاہ پٔرِین ہند