Kashmiri Culture & Language| کاشر زبان تہ کلچر
 

سے میہ دلس کان


امین کامل

میہ ٲس ریڈیو سرینگر کس دٔپس پیٹھ احدزرگر سندس اکس بٲتس ادبی کہو روحانی سام ہیژمژ۔ ادیب یکطرف، امہ ژۅلہِ ہندٮن لوکن ٲس یہ سیٹھا پسند آمژ۔ زرگر صابن تہِ ٲس بوزمژ تہ میہ متعلق ٲسن پرژھ گٲر کرمژ۔یہ ووٚن میہ اکۍ دوستن یس تمہِ وزِ تتہِ اوس۔ بٲتھ اوس:
رنگ بالہ ڈوٚلم تازہ گلس سے میہ دلس کان
سنگ کالہ ژوٚلم رازہ بلس سے میہ دلس کان
یی پانہ ہیژام جانہ مۅلس تی تھووم ارزان
بیگانہ دپان توتہِ لۅلس سے میہ دلس کان
نارچ ریہہ چھم جسم کلس دمبدم تیزان
پارچہ زالۍ نم سور ملس سے میہ دلس کان

میہ کٔر امس دوستس نشہ خواہش ظاہر زرگر صابسس سمکھنچ۔ امۍ دوٚپ ادہ تتھ کیا چھہ۔ پگاہ دگرس یکھہ میہ دوٚپس ادہ کیا۔ پگاہ کوٚڈ میہ یتھہ تتھہ وقت تہ گوس۔ گرواجنۍ ٲسم ہسپتالس اندر داخل۔ زرگر صابن کوٚرم بڈہ جان وٮوہارہ سان آو آو۔

کمرس منز ٲسۍ میٲنس زانۍ کار دوستس علاوہ بییہ تہِ زنۍ جوراہ بہت۔ بہ ووٚتھس زرگر صابس کن میہ حض گژھۍ خلوکھ منٹ پونشہ دنۍ۔ میہ ووٚنے اوت زِ یم تریشوے نفر وتھۍ تہ درایہ، شاید نیبر کن یا بییس کنہِ کمرس منز بیہنہِ۔ زرگر صاب ووٚتھ "ونۍ تو۔"

میہ دوٚپس "میہ نہ حض چھیہ گنڈتھ ژوٚپرتھ کینہہ لفظ ورد کرنس پیٹھ رژھ تہِ پژھ۔ معافی گژھٮم دنۍ۔ یتھہ پاٹھۍ حض چھم تصوفک ظاہری علم سیٹھا کینہہ، مگر عملی رنگہ چھا سہ کارک کنہ نہ، تتھ متعلق چھم اندرۍ شکھے وۅتلان۔اوے کنۍ چھم نہ تعویزن، پھۅکن، شرنہِ پھۅلٮن ہنز قصہ خوانی ہٹہِ وسان۔

یہ اوس میہ مدعیہ وچھان۔میہ ووٚنس ہرگاہ یہ پرژھن بے ادبی گژھہِ نہ، تۅہہِ کیا ہیو پرووہ، کتھہ کنۍ پرووہ تہ کوٚت ہیو واتۍوہ؟ یہ بوزتھ گوٚو یہ تھوٚد ؤتھتھ تہ دروازہ یس یلے اوس کوٚرن بند۔ پوٚز گوٚو بہ گابریوس ہیو۔یہ آو تہ بیوٹھ۔ وۅندہ کھولِتھ کرٮن واریاہ کتھہ۔ واریاہ اوٚندر بووُن تہ ٲخرس دیتنس لیکھت۔"میہ چھہ نہ پانس کینہہ اتھہِ آمت ژیہ کیا باوے؟ بس بہ چھس اچھ بند پننس حسابس آسان زِ اتھۍ منز چھیہ کنہِ ساعتہ اندرۍ نورہ پریوہ پیوان، مندیُن ہیو گژھان تہ ستی لوسان۔امہِ علاوہ وچھم نہ کینہہ۔ وچھہ تہِ کیا؟ تس چھا کانہہ صورتھا شکلا۔

ہنا دم دتھ دوٚپن اکہ وقتہ اوس میہ گمانہ مۅردس تے دپہ وۅتھ، برابر وۅتھہِ۔ دۅہہ اکہ آیہ اکھ زنانہ میہ نش۔ کُن نیچو اوسس مرنہ سر در بستر۔ بچنچ ٲسس نہ کانہہ برانتھا۔ میہ آو عار۔ گوسس نیچوس ترٲومس پننہ حسابہ نظر۔ ڈٮکس پیٹھ تھوومس اتھہ تہ دوٚپمس ووٚتھ سا گۅبرا۔ ونہِ اوسم یُتے ووٚنمت، امس گیہ لارن ہش تہ گذریوو۔

میہ دوٚپس ادہ حض بییہ ساعتہ گژھہ حاضر۔ کتھہ چھیہ واریاہ کرنہِ۔ ونۍ کٮن چھم جلدی۔ گرواجنہِ چھم پگاہ آپریشن۔ کامیاب گژھہِ روزن۔ اسۍ وتھۍ تہ واتۍ دروازس نشہ۔ امۍ کوٚڈ چندہ منزہ شرنہِ پھۅل تہ دیتنم۔ "یہ گژھیس ریُن خدا کرِ سہلے۔" میہ آیوو اسُن، زورے روٚٹم۔

ہسپتالہ بوزنٲوم گرواجنۍ یہ قصہ۔ سۅ وژھ کتہِ تھووتھ۔ دِ یورۍ بہ کھٮمہ۔ حالانکہ سۅ تہِ چھیہ نہ یمن چیزن ہنز قایل۔

دراصل ییلہ انسان کۅلہ چھہ پھٹان سہ چھہ گاسہ کربچن تہِ تھپہ دوان زِ امی سیتۍ ما بچہ۔ زو تہ بے۔

امہ پتہ آو نہ میہ امس نشہ گژھنک کانہہ موقعہ۔ اکہ دۅہہ تھٲو ریڈیو سرینگرن اہندس گرس منز امس سیتۍ اکھ مجلس۔ ڈایریکٹر ریڈیو کے کے نیر، غلام رسول نازکی، اوتار کرشن رہبر، تہ ریکارڈ کرن والۍ زہ نفر ٲسۍ امس برونٹھہ کنہِ بہت۔ امۍ کوٚر اتھہ سیتۍ میہ پانس نشہ بٮہنک اشارہ۔ میہ ووٚنس یم حض چھہِ غلام رسول نازکی بزرگ تہ عالم انسان، یمے بٮہن تۅ ہہ سیتۍ ۔ امۍ کوٚر کلہ سیتۍ انکار تہ میہ ہووُن وۅلہ پکھ۔ خبرزٮو کیازِ کھوجن نہ۔ میانۍ کنۍ اوس پننس کتھ تام حسابس سیتۍ آور۔ نیر صابن ہووم گژھ بٮہہ۔ بہ گوس تہ بیوٹھس۔ امس سیتۍ سپز نفیس کتھ باتھ یۅسہ ریکارڈ سپز تہ براڈکاسٹ تہِ آیہ کرنہ۔ میہ سونچاو تمہِ منزہ کینہہ اہم کتھہ یتھ تحریرس اندر محفوظ کرنہِ، مگر یہ بوزتھ سپدم افسوس زِ سۅ ریکارڈنک چھیہ نہ سٹیشن والیو سٲمتھ تھٲومژ۔ تتھ کۅسہ آرکاییو اہمیت ٲس تمہ نشہ بالکل بے خبر۔۔۔ ونۍ زِ کیا؟ سے میہ دلس کان!

?