Kashmiri Culture and Language|کاشر زبان تہ کلچر
 

قدیم صٲبن گرہ، پرون شعرہ ماٹھ


امین کامل

شتوہ اکتوبر 1952 اوس، وۅستہ قادر کھار، مرزا عارف، ابراہیم بیگ تہ بہ گے سدرہ بل قدیم شاہ صابن گرہ۔ تمن ٲس سانہِ ینچ کالے شٮچھ گامژ تہ سانہِ خاطرہ اوسکھ کھٮنہ چٮنک تہ گٮونک سنز کوٚرمت۔ وۅسہ قادرس اوس تور گژھنہ منزہ گٮون باتھا بوزن مقصد۔ چونکہ سہ اوس عارف صابس روحانی گۅر اوہ کنۍ پیوٚو عارف صابس تہ ابراہیم صابس (تس تہِ اوس گۅر) تہِ سنگ رٹن۔ مٮہ تہِ کوٚر آمنا۔

بتہ کھٮتھ لج پہرا دربار داری۔ مٮہ ہیژ اتھ ہنا ادبی کٲم۔ حبہ خوتونہِ ہندۍ ترٮہ ژور وژن تہ بییہِ دۅن شاعرن ہندۍ زہ بٲتھ کٔرم قلمبند۔ اسۍ بیٹھۍ اتہِ امہِ یمہ گٲنٹہ تارہ، یتھ اندر کھٮنہ چٮنن تہ گٮون مجلسہِ ژوٚر وقت کھیوٚو۔

مگر مٮہ رود سخ ٹکھ تہ 6 مے 1953 پٮٹھہ گوس بہ قدیم صابس نشہِ کٔژِ لٹہِ ذاتی خۅد غرضی کنۍ۔ سہ گوٚو حبہ خوتونہِ ہند کلامہ حاصل کرنہِ۔ ادہ امۍ دریا دل انسانن ہوو نہ کنہِ قسمک کانہہ بۅخل۔

قدیم صاب اوس پرانہِ کاشرِ شاعری ہند گنجینہ۔ پانہِ تہِ اوس شاعر۔ یاداش اوسس بٮہ داد مگر افسوس سہ سورے خزانہ گوٚو تمۍ سے ستۍ دفن۔ سہ اوس شوقہ پاٹھۍ گٮوان تہِ۔ تمہِ وزِ ٲسس ترٮہ ستۍ بٲج تہِ واینس گاینس۔ تہندۍ ناو ٲسۍ اسداللہ وانی ولد صدیق وانی حضرت بل(امۍ سند یادہ ووٚتر اوس قدیم صابس تہِ ژوٚرے۔)، حبیب اللہ ولد رحمان یتو، سدرہ بل، محمد سلطان ولد جمال سوداگر، حضرت بل۔ یم ٲسۍ سازندر ساز وایان مگر تمہِ آیہ گٮوان زِ بوزن والٮن اوس یندرازنہِ پرستانی دربارک سرور یوان۔ یہ اوس کلاسیکل تہ لوکہ طرزچ ملہ مش۔ کینژن بٲتن ہنز گٮون لیہ چھٮہ ونہِ تہِ مٮہ ذہنس اندر رژھرتھ۔

قدیم صابن گرہ چھہ پتہ وتھ اکثر شاعرن ڈیرہ رودمت۔ گامہ پٮٹھہ وژھاو کانہہ شاعر شہر، کنہِ تہِ کامہِ خاطرہ تہ واژاو سدرہ بل یہند گرہ۔ محمود گامی تہ رسول میر سندی پٮٹھہ چھہ اکثر شہری تہ گامی شاعرن اور ین گژھن رودمت۔ اتہِ ٲسۍ تم پننۍ پاٹھۍ مجلسا کران تہ بقول قدیم صاب تمن تہِ چھٮہ اتی کم زیادہ ’’شۅد بۅد‘‘ لاریمژ۔ امہ لحاظہ ہٮکو اسۍ کنہِ حلہ زِلہ روٚس ؤنتھ زِ یہ گرہ چھہ پتہ وتھ ’’کاشر شعرہ ماٹھ‘‘ رودمت۔

سدرہ بل کس اتھ زمینہ ژکلس چھہ کیہتام شرف زِ اکہِ طرفہ اوس اتہِ قدیم صابن گرہ کاشرِ بٲتہ مجلسہ گرماوان تہ دوذٚیمہ طرفہ اوس اتی’’ مٮرزہ باغس‘‘ اندر مرزا سعد الدین سعد (یہند ادبی وارث اوس مرزا کمال الدین شیدا) فارسی تہ اردو شعرہ محفلہ سجاوان، یمن منز مولانا شبلی نعمانی، جسٹس شاہ دین، سرعبدالقادر، اقبال کشن در، راج کاک فرخ، خوشی محمد ناظر، منشی سراج الدین، محی الدین قمر بیترِ شریک چھہِ سپدۍ متۍ۔ امہِ پتہ تہِ تھوو مرزا کمال الدین شیدا صابن کٍتس کالس یہ ژونگ دزون تہ مقامی کیو بیرونی شاعر ٲسۍ اتہِ سمتھ پانہ وانۍ شعر بوزناوان تہ داد رٹان۔ موے مقدسن تہِ کوٚر اتھۍ جایہ قرار تہ کشمیر یونیورسٹی تہِ سپز اتی قایم۔

قدیم صابنس بابہ صابس اوس سبحان شاہ ناوتہ سکونت ٲسکھ پتہ وتھ سدرہ بل۔ یم چھہِ شاہ غفورنہِ اکہِ شاخہ اندرہ۔ شاہ غفور اوس دوا فروش (ادوایی)۔ گۅڈہ اوس اتی روزان، پتہ گوٚو یہ جاے ترٲوتھ چھون (بڈگوم) بسنہِ۔ تہِ چھٮہ نہ خبر کیازِ ۔ البتہ تمۍ سنز اکھ شاخ روز پننی جایہ برقرار تہ قدیم صاب چھہ تمی شاخہ اندرہ۔ یمو اوس نہ پوٚرمت کوٚرمت کینہہ تہِ اما پوٚز شاعری ہنز ٲسکھ وزنۍ۔ واریاہ کلامہ چھکھ صوفیانہ رنگس اندر ووٚنمت۔ اکھ سۅمبرن بٲتن دہہ مرن ہنز کریایکھ چھاپ۔ مگر تتھ ییلہِ کتابت چہ کینہہ غلطی درایہ سارے کٔرکھ نارہ بزۍ۔ مگر تمچ اکھ کاپی چھٮہ یہندۍ فرزندن سٲمتھ تھاومژ۔ یمو چھہ ’’یوسف زلیخا‘‘ ژۅداہ لنجہ تہِ ونۍ مژ تہ پرٮتھ لنجہِ چھہِ تقریبا ترٮہ ہتھ شعر۔ یہند بابہ صاب سبحان شاہ اوس شاعر۔ یم سپدۍ 11 جمیدالاول 1379 ھ مطابق 21 نومبر 1959 واصل حق۔ تمہِ ساتہ ٲس یہنز وٲنس 65 وری۔ عبدالاحد آزادن یہ ونن چھہ نہ صحیح زِ 1945 اندر ٲسۍ تم 45 وہرۍ۔ یمن چھہِ ترٮہ فرزند محمد مقبول، عبدالاحد تہ عبدلرشید تہ ترٮنوے چھہِ خۅدایس حوالہ جان اوسودہ حال۔

قدیم صابنۍ گرواجنۍجان دٮد چھٮہ ونہِ جیات تہ الہ پلہ ہتہِ وٲنسہِ۔ یمن تہِ چھہ انیکھ یاداش اوسمت یس وۅنۍ بلکل روومت چھکھ۔ امی یاداش کنۍ اوس یمن تہِ شاعرن ہند کلامہ ازبر۔ یمو چھٮہ شاعرن تہ خۅدا دوستن ہنز، یم یہند یوان گژھان ٲسۍ، کھٮن چٮن حاضر تھاونہ رنگۍ کنہِ ڈٮکہ درہہ ورٲے تہ وژھہِ وانجہِ بٮہ داد خدمت کرمژ۔

?