Kashmiri Short Story|کاشر افسانہ
 
   

ہری کرشن کول

 

ہری کرشن کول (2008-1934) زایہ زٲندار محلہ سرینگرس منز تہ دلہِ منز گیہ یمہ دنیا رخصت۔ یم چھہِ کاشرِ زبانۍ ہندۍ اکھ کامیاب افسانہ نگار تہ ڈراما نگار ۔ یمو کوٚر کاشرس افسانوی ادبس تھیکن لایق برژر۔ یہندٮن افسانن منز چھہ زیادہ تر کردارن ہنزِ عملہِ تہ تہندٮن مکالمن پیٹھ زور۔

یم اسۍ گۅڈہ گۅڈہ ہندی پاٹھۍ لیکھان تہ 1966 منز کوٚرکھ امین کامل سندس اصرارس پیٹھ کاشرۍ پاٹھۍ لیکھن شروع۔ "تاپھ" افسانہ سیتۍ کوٚر یمو دسلابہ یس شیرازہ کس کاشر افسانہ نمبرس منڑ چھپیوو۔

یمو چھپاوِ ژور افسانہ سۅمبرنہ۔۔ پتہ لاران پربت(1972)، حالس چھہ روتل(1985)، یتھ رازدانے (1996)تہ زول اپٲرم (2001)۔ یتھ رازدانے کتابہ پیٹھ میول یمن ساہتیہ اکاڈمی ایوارڈ۔

یہندۍ واریاہ ڈراما سپدۍ کشیرِ منز سیٹھا مقبول یمن منز دستار، لالہ صٲب، ییلہ وتن کھر چھہ یوان تہ ناٹک کرو بند چھہِ۔

تنقیدی تبصرہ

۔۔ "ہری کرشن اوس نہ افسانہ باپت غیر معمولی واقعہ تلاش کران ،بلکہ دۅہ دٮنچہِ زندگی منز سیٹھاہ معمولی وا قعہن یمن منز سہ پننہِ شخیژ ہنز کا نہہ اہمیت در یافت کران اوس۔

ہری کر شن کو لُن طنز تہِ چھہ نہ تفر یحہ کہ غر ضہ کوشش کرِ تھ پٲد ہ آمت کرنہ طنز، بلکہ چھہ یہ کر دارن ہنزِ بے لا گ عکاسی ہند فطری نتیجہ؛ باسان چھہ زنتہ تہنز بشری فطرت کُنہِ دیوہ شایہ پٮٹھہ وچھنہ آمژ چھیہ۔ سہ چھہ نہ تمن مسخرہ بنٲوِ تھ پٲتھر چاران بلکہ چھہِ تمِ پا نے پننۍ مکھٹ تُلِتھ اسنس لا یق بنان ۔ کر دارن ہندۍ نفسیاتی مسلہ تہ تہنز کج ادٲیی ہٲوِتھ چھہ ہری کر شن کول پننس کلہم سماجس سیتۍ متصادم یس سماج سنہ ستتٲجہِہ پتہ پر یتھیبوو۔ لٲل مجنون قصہ ، اکھ صٲب بیا کھ صٲب ، حالس چھہ روتل، شمشان وٲراگ، بٹن ہندِ خٲطرہ دھرمہ کتھا یۅ سہ مسلمان بٲے تہِ پٔرِ تھ ہیکن، ہوۍ افسانہ چھہِ سماجہ کس نیبرۍلیہلاوس ترہ کرِتھ کٲشرین بٹن کیو مسلما نن ہند عیان تہ نہان پزرپر ن وٲلس بر و نٹھہ کَنہِ تھاوان تہ بییہ تتھہ پٲٹھۍ ز نتہ اتھ منز افسانہ نگار سند دخل کہِنۍ تہِ چھہ نہ۔ کو ل چھہ بعضے خارجیت ترٲ وِ تھ لاشعوری کیفیت تہِ تتھہ پٲٹھۍ ورتاوان زِ پرن وول چھہ باور کران۔ مثلاً پر و فیسر چھہ لٮکچر دوان زانان ز سہ چھہ ییزارہ روٚ ستے کالج آمت ( اکھ عر یاں کتھ) یتھے پٲٹھۍ چھہ"سرنۍ کھیل" افسانس منز ٹا کا رہ دنیا غیبے گژھان تہ کر دار چھہ لرزان زِ تَس خلاف چھیہ بارہ سٲزش سپدان ۔ اتھ برعکس ییلہ خٲلص حقیقت پسندی کٲم آسہِ ہینۍ "شمشان وٲراگ" افسانکۍ کردار۔۔ ٹار زن ، ڈاکٹر ، پیڈرو تہ پہلوان ۔۔ چھہِ و ۅ تلان یہنز ظٲہری آزٲدی تہ لاپر وٲیی تہنزِ ذہنی لاچٲری تہ اقتصٲدی بدحٲلی ہند ہو بہو عکس چیہے ۔ یم چھِہ تم مولہ چھینۍ لوکھ یمن کانہہ سکونت نہ آسنہ کِنۍ کُنہِ سیتۍ کانہہ وابستگی تہِ چھیہ نہ ۔ پیڈ رو چھہ پننہِ ماجہِ داہ دِتھ "آزاد" سپدان ۔ "اکی رنگہ نہ پریتھ رنگہ آزاد" ۔ موج چھیہ تمۍ سنز ( تہ تَس سیتۍ سار نے ہنز ) پرزنتھ ۔

ہری کرشن سندٮن کینژن افسانن منز چھیہ روایتی لکہ کتھِہ ہنز تیکنیک تہِ کامیاب پٲٹھۍ ورتاونہ آمژ۔ امہ قسمک لازوال افسانہ چھہ "پھرِ" یتھ منز ا وٚن، ز وٚر، لوٚنگ، کون، کوٚل، ٹنڈہ، دولہ، وونگ، کھوسہ، کوٚب تہ پھوٚپھ ۔۔ کردار اکس پتھرِ منز گاڈہ رٹِتھ امنہ سان دٮن گذٲری کران ٲسۍ۔ کٲنسہ اوس نہ کٲنسِہ ہند عناد، سارنے اوس کانہہ نتہ کانہہ عیب تہ سارنے ٲسۍ پٲژھۍ نٲلۍ۔ مگر تہند یہ سۅکھ گوٚوختم ییلہ اتھ پتھرِ منز کرِہُن پوژھ ژھنِتھ کُستام آو تہ دیتنکھ اکھ اکس نِشہ بیوٚن بیوٚن آسنک ترغیب۔" ناجی منور، شفیع شوق: کاشرِ ادبک تواریخ 2012

۔۔ "ہری کرشن کول چھہ واقعہ چہ دلچسپیہ یا امہ کس نوِرس یا امہ کس المیہ یا ہزنیہ آسنس پیٹھ شعوری زور دنہ بجایہ کردارن ہنزن حرکژن، کتھن، تہندٮن طور طریقن کن پھرۍ پھرۍ اشارہ کٔرتھ اتھ واقعس منز تہند وطیرہ ہاوان تہ تم چھہِ پنن درون کیو بیرون ہیتھ وۅتلان۔" شفیع شوق

۔۔ ہری کرشن کول سندٮن افسانن منز چھہ کتھہِ "کردار برونہہ پکناوان یا ونو واقعہ چھہ کردار تخلیق سپدان۔ تمۍ سند فن چھہ نہ ٹاسر تکیازِ اتھ منز چھیہ نہ عام پاٹھۍ سۅ ٹاکٲریت یۅسہ فنس بدون آسان چھیہ۔ ورگہ اظہار تہ کتھہِ ہندٮن پنن ہند مسلسل ابساو چھہ ہری کرشنہ نہِ فنچ اہم خصوصیت۔ سہ چھہ پننٮن افسانن منز نہ وٮکھژہ کتھہ کران تہ نہ خیالی۔ سہ چھہ نہ لفظن معنی بدلنک یا بدلاونک دعوی تہِ کران۔ سہ چھہ نہ پنن فنی کھۅچر کھٹنہ خاطرہ نوِ ژنتایہ ہند پردہ تہِ مولۍ انان۔ سہ چھہ نہ واتناویرس ودنہ خاطرہ لفظن گنڈۍ گنڈۍ علامژن ورگس ژانان۔ سہ چھہ نہ فلسفہ ونان، نہ مارکس دانہِ راوان تہ نہ فرایڈ سنز اضافیت ونان تہ نہ فرانس چٮن میمن کاشرس برونہہ کن أنتھ برم دوان تہ نہ افسانن تم عنوان دوان یمن کن وچھتھے پرن وٲلس ہابتھ گژھان چھہ۔ سہ چھہ پننہ دورکۍ تجربہ کشیرِ ہندِ حوالہ دۅہدش کٮن معمولی واقعن منز پیش کران۔ تس چھیہ سہ ماحول وۅپداونچ رژ مہارت یتھ منز سہ کردارن نیشہ ناوان چھہ۔ تمۍ سندۍ کردار پوشہ کج یا تاراوتی، کشن چند یا موہن لال، مکھنہ، سلہ یا موہن جی چھہ پننہ ماحول تہ پس منظر کنۍ تہِ یہ یم چھہِ [یہ غلطی چھیہ چھپیمتس مضمونس منز موجود]۔ ہری کرشن نٮن افسانن منز چھہِ واقعہ تہ کردار اکھ اکس سیتۍ پیوستہ تہ افسانہ نگار چھہ افسانس منز ڈرامٲیت پیدہ کرنہ خاطرہ اسہ عام پاٹھۍ کردار کہ وٲسدہ واقعس تام واتناوان۔" امر مالموہی